ჰოლანდიაში საუკუნის ძარცვა მოხდა. კუნსტჰალმუზეუმიდან ქურდებმა რამდენიმე წუთში, გოგენის, პიკასოს, მატისის, ფროიდის, მეიერ დე ჰანის და მონეს რამდენიმე ნამუშევარი მოიპარეს. ნაქურდალის საერთო ღირებულება 300 მილიონ ევროა. მიუხედავად იმისა, რომ განგაშის ზარიდან 5 წუთში დაცვა და პოლიცია ადგილზე გაჩნდა, მათ ნამუშევრების გადარჩენა მაინც ვერ მოასწრეს.
საღამო, რომელიც დიდი დანაკლისით დასრულდა, 150 ნამუშევარს აერთიანებდა და ტრიტონის ფონდის კოლექციის პირველი საჯარო გამოფენა იყო.
მუზეუმის დირექტორი აცხადებს, რომ მოპარული სურათები კრიმინალურ სამყაროში ძალიან დიდხანს დარჩება. „მათი გაყიდვა შეუძლებელია. არსებობს საშიშროებაც, რომ მძარცველები ნახატებს გაანადგურებენ, იმიტომ, რომ ისინი მათ ვერ გაყიდიან.“ - ამბობს უსაფრთხოების ექსპერტი ტონ კერერი.
ამ შემთხვევაში პოლიცია ვარაუდობს, რომ მძარცველები გამოსასყიდს მოითხოვენ, თუმცა, როგორ მოახერხეს ქურდებმა საკმაოდ მაღალი დონის უსაფრთხოების სისტემის გარღვევა და ნამუშევრების მოპარვა ძალის გამოყენების გარეშე უცნობია.
ჰოლანდიაში, კერძოდ კი ამსტერდამში, 1991 წელს ვან გოგის 20 უნიკალური ნამუშევარიც გაიტაცეს.
